Rais Ruto Aonya Dhidi ya Kuvuruga Amani Kabla ya Maandamano ya Kesho

Rais William Ruto akihutubia taifa kutoka Ikulu ya Nairobi, akitoa wito wa kudumisha amani kuelekea maandamano yaliyopangwa kufanyika kesho, Juni 25, 2025.

Rais wa Jamhuri ya Kenya, Dkt. William Ruto, ameonya vikali dhidi ya jaribio lolote la kuvuruga amani ya nchi, saa chache kabla ya maandamano yaliyopangwa kufanyika kesho, Jumatano.

Akizungumza leo katika Ikulu ya Nairobi, Rais Ruto amesema serikali haitasita kuchukua hatua kali dhidi ya yeyote atakayekiuka sheria wakati wa maandamano. Amehimiza kuwa maandamano ni haki ya kikatiba, lakini lazima yaendeshwe kwa amani na kwa kuzingatia sheria.

“Tutahakikisha kuwa kila Mkenya ana uhuru wa kujieleza, lakini hatutakubali fujo wala uharibifu wa mali,” alisema Rais Ruto.

Maandamano ya kesho yamepangwa na makundi mbalimbali ya kijamii na baadhi ya viongozi wa kisiasa, wakilalamikia hali ya uchumi, kodi, na utawala. Huku waandaaji wakiahidi kuwa yatakuwa ya amani, serikali imeweka mikakati ya kuhakikisha usalama kote nchini.

Rais Ruto pia aliwataka wananchi kuunga mkono maafisa wa polisi ambao watakuwa kazini kuhakikisha usalama unaimarishwa wakati wa maandamano hayo.

“Polisi wetu ni walinzi wa amani. Tuwaheshimu, tuwape ushirikiano, na tusikubali mtu yeyote kuwatisha au kuwashambulia,” alisema.

Serikali imethibitisha kuwa maafisa wa usalama, wakiwemo waliovaa sare na wale wa kiraia, watakuwa mitaani kuhakikisha kuwa maandamano hayageuki kuwa ya vurugu.

Kwa sasa, taifa linaangalia kwa makini namna maandamano ya kesho yatakavyotekelezwa, huku wito wa amani ukitolewa kutoka kwa pande zote.